സഭയിൽ അശ്ലീല വീഡിയോ: ബ്രിട്ടീഷ് പാർലമെന്റ് അംഗം രാജി വെച്ചു 


ബ്രിട്ടന്റെ അധോസഭയായ ഹൌസ് ഓഫ് കോമ്മൺസിൽ സഭാ സമ്മേളനം നടക്കുന്നതിനിടയിൽ അശ്ലീല വീഡിയോ കണ്ടു കൊണ്ടിരുന്ന കൺസർവേറ്റീവ് പാർട്ടി അംഗം നെയിൽ പാരിഷ് വിവാദങ്ങളെ തുടർന്ന് രാജി വെച്ചു. 65 വയസ്സുള്ള പാരിഷ് സഭയിലെ പരിസ്ഥിതി, ഭക്ഷ്യ, ഗ്രാമീണ വകുപ്പുകളുടെ ചെയർമാൻ ആണ്. 
ഏപ്രിൽ 27, ബുധനാഴ്ചയാണ് സ്വന്തം പാർട്ടിയിലെ വനിതാ മന്ത്രി തന്നെ ചേംബറിൽ തന്റെ സമീപത്തിരുന്ന സഹപ്രവർത്തകൻ അശ്ലീല വീഡിയോ നിരീക്ഷിച്ച കാര്യം ആദ്യം പരാതിപ്പെട്ടത്. പക്ഷെ ആരോപണവിധേയനായ വ്യക്തിയുടെ വിവരങ്ങൾ അവർ പുറത്തു വിട്ടിരുന്നില്ല. മറ്റൊരു സന്ദർഭത്തിലും ഇതേ വ്യക്തി തന്നെ സമാനകൃത്യം ചെയ്യുന്നതിന് താൻ സാക്ഷിയാണെന്നും അവർ പറഞ്ഞു. അധികം വൈകാതെ മറ്റൊരു വനിതാ അംഗവും ഇതേ പരാതി ഉന്നയിച്ചതോടെയാണ് അന്വേഷണത്തിന് ഉത്തരവിട്ടത്. തുടർന്നാണ് നെയിൽ പാരിഷാണ് കുറ്റാരോപിതനായ വ്യക്തിയെന്ന വിവരം പുറത്തു വരുന്നത്. മൊബൈൽ നോക്കി കൊണ്ടിരുന്നപ്പോൾ അബദ്ധത്തിൽ അശ്ലീല വീഡിയോയിൽ എത്തിപ്പോയതാണെന്ന് പാരിഷ് വിശദീകരിച്ചെങ്കിലും, അതേ സൈറ്റിൽ ഒന്നിൽ കൂടുതൽ വട്ടം സഭാസമയത്ത് തന്നെ സന്ദർശിച്ചതായി കണ്ടെത്തിയതോടെയാണ് വെട്ടിലായത്. ഉന്നതതല അന്വേഷണം കുറ്റക്കാരനായി കണ്ടെത്തിയാൽ പാരിഷിന് സഭയിൽ മാപ്പ് പറയുകയോ അല്ലെങ്കിൽ സസ്പെൻഷനോ പുറത്താക്കലോ നേരിടേണ്ടി വരും. 
ഏതാണ്ട് നാൽപ്പതു ശതമാനം സഭാംഗങ്ങളും വനിതകളായതിനാൽ പാരിഷിന്റെ പ്രവൃത്തി കൺസെർവേറ്റീവ് പാർട്ടിയിൽ പോലും വളരെയധികം എതിർപ്പിനിടയാക്കിയിട്ടുണ്ട്. മെയ് അഞ്ചിന് തദ്ദേശസ്വയംഭരണ സ്ഥാപനങ്ങളിലേക്ക് തെരഞ്ഞെടുപ്പ് നടക്കുന്നതിനാൽ പ്രസ്തുത സംഭവം കൺസെർവേറ്റീവ് പാർട്ടിക്ക് പ്രതികൂലമായി തീരാൻ ഇടയുണ്ടെന്ന് രാഷ്ട്രീയ നിരീക്ഷകർ കരുതുന്നു.ReplyForward