സ്വർണക്കടത്ത്: ജനം ടിവിയിൽ നാറി സംഘപരിവാരം; ബന്ധമില്ലെന്ന് ബിജെപി

തിരുവനന്തപുരം:  സ്വർണക്കള്ളക്കടത്തു കേസിൽ എൽഡിഎഫ്‌

സര്കാരിനെതിരെ ശക്തമായ പ്രക്ഷോഭം അഴിച്ചുവിട്ടു പ്രതിപക്ഷത്തു യുഡിഎഫിനെ മലർത്തിയടിക്കാൻ  കരുനീക്കം നടത്തിയ ബിജെപി സംസ്ഥാന നേതൃത്വം സ്വർണക്കടത്തു കേസിൽ ആർ എസ് എസ് ചാനലിന്റെ ബന്ധം പുറത്തുവന്നതോടെ പ്രതിസന്ധിയിലായി.

ആർഎസ്എസ് നിയന്ത്രണത്തിലുള്ള   ജനം ടിവിയുടെ കോർഡിനേറ്റിംഗ് എഡിറ്ററും ചാനലിലെ പ്രധാന അവതാരകനുമായ അനിൽ നമ്പ്യാരെ കള്ളക്കടത്തു കേസുമായി ബന്ധപ്പെട്ടു ഇന്നലെ അഞ്ചുമണിക്കൂറാണ് കൊച്ചിയിലെ എൻഐഎ ഓഫീസിൽ ചോദ്യം ചെയ്തത്. സ്വർണക്കടത്തുമായി ബന്ധപ്പെട്ടു ജനം ടിവി പ്രതിനിധിയെ സംബന്ധിച്ചു കേസിലെ രണ്ടാം പ്രതി സ്വപ്നാസുരേഷ് നേരത്തെ നൽകിയ മൊഴിയുടെ അടിസ്ഥാനത്തിലാണ് എൻഐഎ അനിൽ നമ്പ്യാരെ ചോദ്യം ചെയ്തത്. ഇന്നലെ  വൈകിട്ടു വിട്ടയച്ചുവെങ്കിലും അനിൽ നമ്പ്യാർ സംശയ നിഴലിൽ തന്നെയാണെന്നും വീണ്ടും ചോദ്യം ചെയ്യൽ അടക്കമുള്ള നടപടികൾ ഉണ്ടാവുമെന്നും എൻഐഎ വൃത്തങ്ങൾ വെളിപ്പെടുത്തിയിട്ടുണ്ട്. കള്ളക്കടത്തായി വന്ന സ്വർണം പിടികൂടിയപ്പോൾ അതു വന്നതു നയതന്ത്ര ബാഗേജ് എന്ന നിലയിലല്ലെന്നും അതു സ്വകാര്യ ബാഗേജ് മാത്രമാണെന്നും പ്രചരിപ്പിക്കാനായി ജനം ടിവി പ്രതിനിധി സ്വപനാ സുരേഷിനെ ഉപദേശിച്ചതായാണ് എൻഐഎ ചോദ്യം ചെയ്യലിൽ കണ്ടെത്തിയത്. സ്വർണം പിടികൂടിയ ദിവസം ഒന്നിലേറെ തവണ അനിൽ നമ്പ്യാർ സ്വപനയെ  ബന്ധപ്പെട്ടതായി എൻഐഎ കണ്ടെത്തിയിരുന്നു. അങ്ങനെ ബന്ധപ്പെട്ടത് വാർത്തകൾ  സംബന്ധിച്ച് വിവരങ്ങൾ തേടാനാണെന്ന അനിൽ നമ്പ്യാരുടെ  അവകാശവാദം വിശ്വസനീയമല്ല എന്നാണ് വിലയിരുത്തൽ. കാരണം പ്രതിയെ കേസിൽ നിന്നു രക്ഷപ്പെടാൻ സഹായിക്കുന്ന  പ്രവർത്തനം  മാധ്യമ പ്രവർത്തനത്തിന്റെ ഭാഗമായി ലോകത്തു ഒരിടത്തും അംഗീകരിച്ചിട്ടില്ല.. ആർഎസ്എസ് ചാനലിന്റെ പ്രമുഖൻ നടത്തിയ ഈ അവകാശ വാദമാണ് ബിജെപിക്കും അവരെ പിന്തുണക്കുന്ന സംഘപരിവാര പ്രസ്ഥാനങ്ങൾക്കും വലിയ തിരിച്ചടിയായി മാറിയിരിക്കുന്നത്.

സ്വർണക്കടത്തു കേസിൽ  രാജ്യദ്രോഹ പ്രവർത്തനങ്ങൾ അടങ്ങിയിട്ടുണ്ട് എന്ന വാദം ഉയർത്തി എൽഡിഎഫ്സർക്കാരിനെ ആഞ്ഞടിക്കാനുള്ള ശ്രമമാണ് ബിജെപി നേതാക്കൾ നടത്തി വന്നത്. എന്നാൽ  ഇടതുപക്ഷക്കാരായ ഒരാൾ പോലും കേസിൽ പ്രതിയല്ല എന്നു മുഖ്യമന്ത്രി പിണറായി വിജയനും സിപിഎം നേതാക്കളും ചൂണ്ടിക്കാട്ടുന്നു.  നേരത്തെ കേസിൽ പ്രതിയായ സന്ദീപ് നായർക്കും ബിജെപിയോടു  ബന്ധമുണ്ട് എന്നാണ് സിപിഎം വാദിച്ചുവന്നത്. ജനം ടിവിയുടെ പ്രമുഖനു കള്ളക്കടത്തു സംഘവുമായി ഉള്ള അടുത്ത ബന്ധം സംബന്ധിച്ച  വിവരങ്ങൾ പുറത്തുവന്നതോടെ സിപിഎമ്മിനെതിരെയുള്ള ബിജെപിയുടെ പ്രചാരണത്തിന്റെ വിശ്വാസ്യതയാണ് തകർക്കപ്പെട്ടത്. എന്നാൽ ജനം ടിവിയുമായി ബിജെപിക്കു ബന്ധവുമില്ല എന്ന ദുർബലമായ   വിശദീകരണമാണ്‌ ബിജെപി നേതൃത്വം നൽകുന്നത്.