ലൈഫ് മിഷനിൽ സിബിഐ അന്വേഷണം: അപകട സൂചനകൾ അവഗണിക്കാവുന്നതല്ല

ലൈഫ് മിഷനിൽ സിബിഐ ആരംഭിച്ചിരിക്കുന്ന അന്വേഷണം കേരളത്തിലെ ഇടതുപക്ഷ ജനാധിപത്യ മുന്നണി സർക്കാരിനും പ്രധാന  ഭരണകക്ഷിയായ സിപിഎമ്മിനും മുന്നിൽ ഉയർത്തുന്ന വെല്ലുവിളികൾ ചെറുതല്ല. ഇതിന്റെ ദീർഘകാല രാഷ്ട്രീയ പ്രത്യാഘാതങ്ങൾ ഗൗരവമായ പരിശോധന ആവശ്യപ്പെടുന്നതാണ്.

 സാധാരണ നിലയിൽ ഏതെങ്കിലും ഒരു സംസ്ഥാനത്തു നടന്നതായി ആരോപിക്കപ്പെടുന്ന അഴിമതി സംഭവങ്ങളിൽ നേരിട്ടു സിബിഐ അന്വേഷണം  പതിവില്ല. ഒന്നുകിൽ ബന്ധപ്പെട്ട സംസ്ഥാന സർക്കാർ സിബിഐയോട് അന്വേഷണത്തിനായി ആവശ്യപ്പെടണം. അല്ലെങ്കിൽ ഹൈക്കോടതിയോ സുപ്രീം കോടതിയോ അത്തരമൊരു അന്വേഷണത്തിന്‌ ഉത്തരവിടണം. ഇതിനു മുമ്പ് സംസ്ഥാനവുമായി  ബന്ധപ്പെട്ട സിബിഐ അന്വേഷണങ്ങളിൽ എല്ലാം ഈ നടപടിക്രമമാണ് പാലിച്ചതെന്നു കാണാവുന്നതാണ്. അതിൽ നിന്നുള്ള വ്യക്തവും ആശങ്കാജനകവുമായ ഒരു വ്യതിയാനമാണ് ലൈഫ് മിഷൻ ഇടപാടിൽ ഇന്നലെ സിബിഐ കേസ് രജിസ്റ്റർ ചെയ്തു ആരംഭിച്ച അന്വേഷണ പ്രക്രിയയിൽ കാണാൻ കഴിയുന്നത്. വടക്കാഞ്ചേരി എംഎൽഎ അനിൽ അക്കര നൽകിയ പരാതിയുടെ അടിസ്ഥാനത്തിലാണ് അന്വേഷണം എന്നാണ് സിബിഐ രജിസ്റ്റർ ചെയ്ത പ്രഥമാന്വേഷണ റിപ്പോർട്ടിൽ പറഞ്ഞിരിക്കുന്നത്.

ഇതു സാധാരണ  നടപടിക്രമങ്ങളിൽ നിന്നുള്ള ഗുരുതരമായ വ്യതിയാനമാണെന്നു പ്രഥമദൃഷ്ട്യാ തന്നെ കാണാവുന്നതാണ്. കേസിൽ കേന്ദ്രസർക്കാർ  കാര്യമായ താല്പര്യം കാണിക്കുന്നുണ്ട്  എന്നാണിത് കാണിക്കുന്നത്. കോവിഡ്  ചികിത്സ കഴിഞ്ഞു തിരിച്ചു ആഭ്യന്തര മന്ത്രാലയത്തിലെത്തിയ കേന്ദ്ര ആഭ്യന്തരമന്ത്രി അമിത് ഷായുടെ ആദ്യതീരുമാനങ്ങളിലൊന്നു ലൈഫ് മിഷനിലെ അഴിമതിയുമായി ബന്ധപ്പെട്ട സിബിഐ  അന്വേഷണം സംബന്ധിച്ചാണ് എന്നും തീർച്ചയാണ്. നടപടിക്രമങ്ങൾ തെറ്റിച്ചും അന്വേഷണം എന്ന തീരുമാനത്തിലേക്കു കേന്ദ്ര ആഭ്യന്തരമന്ത്രി എത്തിച്ചേരാൻ എന്താവും കാരണം എന്ന കാര്യമാണ് പ്രധാനമായി  പരിശോധിക്കേണ്ടത്.

അമിത് ഷായുടെ ഉന്നം രാഷ്ട്രീയ നേട്ടമാണ് എന്ന കാര്യം വ്യക്തമാണ്. കേരളത്തിൽ  ഇടതുസർക്കാരിനെ തൂത്തെറിയും എന്നു പ്രഖ്യാപിച്ചു ഏതാനും വർഷം മുമ്പ് പയ്യന്നൂരിൽ നിന്നു പദയാത്ര തുടങ്ങിയ അന്നത്തെ ബിജെപി അഖിലേന്ത്യാ അധ്യക്ഷന്റെ പ്രഖ്യാപനങ്ങൾ ഓർമയുണ്ടല്ലോ. പദയാത്ര തിരുവനന്തപുരത്തു എത്തുമ്പോഴേക്കും കേരളത്തിൽ സിപിഎമ്മിന്റെ കഥ കഴിയും എന്നാണു ഗുജറാത്തിൽ വിഭാഗീയതയുടെയും വർഗീയതയുടെയും രാഷ്ട്രീയ പ്രയോഗത്തിലൂടെ ദേശീയതലത്തിൽ ഉയർന്നുവന്ന അമിത് ഷാ അന്നു പ്രഖ്യാപിച്ചത്. എന്നാൽ ജാഥ രണ്ടു ജില്ല കടക്കും മുമ്പ് അമിത് ഷാ പരിപാടി ഉപേക്ഷിച്ചു സ്ഥലംവിട്ടു.  ഗുജറാത്തിൽ മകന്റെ കച്ചവടത്തിൽ കുമിഞ്ഞുകൂടുന്ന ലാഭം റോക്കറ്റുപോലെ  ആകാശത്തേക്കു കുതിക്കുന്ന വാർത്ത ഡൽഹിയിലെ ദി വയർ എന്ന ഓൺലൈൻ മാധ്യമം പുറത്തു കൊണ്ടുവന്നതോടെയാണ് അമിത് ഷായ്ക്ക് അന്നു ജാഥ ഉപേക്ഷിച്ചു ഓടേണ്ടിവന്നത്.  അതോടെ ഒറ്റയടിക്കു കേരളം പിടിക്കാനുള്ള  പദ്ധതി പൊളിയുകയും ചെയ്തു.

ഇപ്പോൾ അങ്ങനെയൊരു സുവർണാവസരം വീണ്ടും കരഗതമാവുകയാണ് എന്നു കൗശലക്കാരനായ കേന്ദ്ര ആഭ്യന്തരമന്ത്രി കണ്ടറിയുന്നുണ്ട്. അതു ഒരുക്കിക്കൊടുത്തത് ഇവിടെ ഭരിക്കുന്നവർ തന്നെയാണ്. ഇരുമ്പു പഴുത്തിരിക്കുമ്പോൾ ആഞ്ഞടിക്കണം എന്നറിയാത്ത  കൊല്ലൻ ഉണ്ടാവാനിടയില്ല. അമിത് ഷാ അക്കാര്യത്തിൽ കൃസ്തഹസ്തനാണ്‌.  എതിരാളിയുടെ തലമണ്ടക്കു അടിക്കേണ്ട സമയം  നിശ്ചയിക്കാൻ അദ്ദേഹത്തിന് പാഴൂർപ്പടി വരെ പോകേണ്ട കാര്യമില്ല. ബിജെപിയുടെ സംസ്ഥാന നേതാക്കൾ  കുറച്ചു ദിവസമായി വരാൻ പോകുന്ന സിബിഐ  അന്വേഷണത്തെ കുറിച്ചു ചാനലുകളിൽ പ്രവചനം നടത്തുന്നുണ്ടായിരുന്നു. അതു ഇപ്പോൾ യാഥാർഥ്യമാവുമായും ചെയ്തു.

ലൈഫ്   മിഷനിൽ തൃശൂർകാർക്കു വീടുവെക്കാനായി ദുബായ് ഷെയ്ക്ക് നൽകിയ 20 കോടിയിൽ പാതിയും  ഇടത്തട്ടുകാർ അടിച്ചു കൊണ്ടുപോയതിലെ വേവലാതിയാവില്ല അമിത് ഷാ ഇക്കാര്യത്തിൽ ഇടപെടുന്നതിനു കാരണം എന്നു ഉറപ്പ്.  മറിച്ചു ചോരയുടെ മണം കിട്ടിയ ചെന്നായ്ക്കൾ ഇരയുടെ ചുറ്റും വട്ടമിട്ടു കറങ്ങുന്ന പോലെയാണ് ഇപ്പോൾ സിബിഐയുടെ വരവ്. എൻഐഎ,  ഇ ഡി, കസ്റ്റംസ് എന്നിങ്ങനെ വിവിധ കേന്ദ്ര ഏജൻസികൾക്കു പിന്നാലെ സിബിഐയും മണം പിടിച്ചു എത്തിയിരിക്കുന്നു. ഇരയുടെ പ്രാണരക്ഷാർത്ഥമുള്ള പലായനം  അവസാനിക്കാറായി എന്നും അതിന്റെമേൽ ചാടി വീഴാൻ സമയമായി എന്നും അവർ തിരിച്ചറിയുന്നു.

എന്തുകൊണ്ടു ഒരു സംസ്ഥാന സർക്കാരിനെ അരികിലേക്കു  തള്ളിമാറ്റി കേന്ദ്രം ഈ വിഷയത്തിൽ നേരിട്ടു ഇടപെടുന്നു എന്ന ചോദ്യം പ്രസക്തമാണ്. സാധാരണ നിലയിൽ കേന്ദ്ര-സംസ്ഥാന ബന്ധങ്ങളിലെ ഫെഡറൽ തത്വങ്ങളെ അട്ടിമറിക്കുന്ന ഇത്തരം നീക്കങ്ങൾക്കു  കേന്ദ്രത്തിലെ അധികാരികൾ തയ്യാറാവാറില്ല. ഏറ്റവും ചുരുങ്ങിയത് ഇന്ദിരാഗാന്ധിയുടെ കാലശേഷമെങ്കിലും ഇത്തരം കാര്യങ്ങളിൽ കൂടുതൽ വ്യവസ്ഥാപിത രീതികൾ നിലവിലുണ്ട്. കോൺഗ്രസ്സും മറ്റു പ്രതിപക്ഷ  കക്ഷികളും   ഭരിക്കുന്ന സംസ്ഥാനങ്ങളിൽ ഇങ്ങനെ ഇടപെടാനുള്ള സിബിഐ നീക്കങ്ങളെ ബന്ധപ്പെട്ട സർക്കാരുകൾ ഈയടുത്ത ദിവസങ്ങളിൽ പോലും ചെറുത്തു തോല്പിച്ചിട്ടുമുണ്ട്. രാജസ്ഥാനിൽ അശോക് ഗെഹ്‌ലോട്ടും ബംഗാളിൽ മമതാ ബാനർജിയും സിബിഐ ഇടപെടലിനു നേരെ സ്വീകരിച്ച സമീപനം നോക്കുക.

കേരളത്തിൽ ലൈഫ് മിഷനിൽ സിബിഐ ഇടപെടലിൽ കാര്യമായ പ്രതിഷേധമില്ല. മാത്രമല്ല, സ്ഥലം എംഎൽഎയുടെ  പരാതിയുടെ അടിസ്ഥാനത്തിലാണ് അന്വേഷണം എന്നു അവർ പറയുകയും ചെയ്യുന്നു. പ്രതിപക്ഷ നേതാവും വിഷയത്തിൽ സിബിഐ അന്വേഷണം ആവശ്യപ്പെട്ടിട്ടുണ്ട്. അതിനാൽ അവർ ഈ അന്വേഷണത്തെ  സ്വാഗതം ചെയ്യാനാണ് ഇടയുള്ളത്.

ഇന്നു ചേരുന്ന സിപിഎം സംസ്ഥാന കമ്മിറ്റി ഏറ്റവും ഉത്കണ്ഠയോടെ  പരിഗണിക്കാൻ ഇടയുള്ള ഒരുകാര്യം സിബിഐയുടെ പുതിയ ഇടപെടലാണ് എന്നു ഉറപ്പാണ്. സംസ്ഥാന സർക്കാർ പരസ്യമായ നിലപാട് എടുത്തിട്ടില്ലെങ്കിലും സിപിഎം ഇതിനെതിരെ പരസ്യ നിലപാടിലേക്കു വരാനാണ് സാധ്യതയുള്ളത്. കാരണം അഴിമതിപ്പണത്തിന്റെ പോക്ക് തേടി സിബിഐ സെക്രട്ടറിയറ്റിൽ മാത്രമല്ല സിപിഎം നേതാക്കളുടെയും  മന്ത്രിമാരുടെയും വീടുകളിലും പാർട്ടി ആസ്ഥാനത്തുപോലും എത്തിക്കൂടെന്നില്ല. അതൊരു കടുത്ത പ്രതിസന്ധിയാണ്.  അഴിമതിയുടെ നിഴലിൽ ഏതാനും മാസത്തിനകം അവർ വീണ്ടും ജനവിധിക്കായി നാട്ടിലിറങ്ങണം. അതു എളുപ്പമല്ല.

പക്ഷേ എന്തുകൊണ്ടു ഇങ്ങനെയൊരു കേന്ദ്ര ഇടപെടലിനു പഴുതുണ്ടായി എന്ന കാര്യവും അവർ  പരിശോധിക്കേണ്ടതാണ്.  അപ്പോൾ തെളിഞ്ഞു വരുന്ന ഒരു ചിത്രം സർക്കാരിന്റെ മേൽ പാർട്ടിയുടെ നിയന്ത്രണവും മേൽനോട്ടവും  കഴിഞ്ഞ നാലു വർഷങ്ങളിൽ കാര്യമായി ഉണ്ടായില്ല എന്ന വസ്തുതയിലേക്കാണ്. മുഖ്യമന്ത്രിയുടെ  ഓഫീസും ഉപദേശകരുമാണ് കാര്യങ്ങൾ നിയന്ത്രിച്ചതും കുളമാക്കിയതും.  ലൈഫ് മിഷൻ കേസ് സിബിഐയുടെ കയ്യിൽ എത്തിച്ചു കൊടുത്തവരിൽ പ്രധാനികൾ ആരൊക്കെ എന്നു നോക്കുക.  ഒന്നാമൻ മുഖ്യമന്ത്രിയുടെ പ്രിൻസിപ്പൽ സെക്രട്ടറി എം ശിവശങ്കർ, രണ്ടാമൻ അഴിമതിപ്പണം   പ്രതിപക്ഷം ആരോപിച്ചതിലും എത്രയോ ഇരട്ടിയാണെന്നു വെളിപ്പെടുത്തി അതു സജീവ വിവാദമാക്കി നിർത്തിയ കൈരളിയിലെ മാധ്യമ ഉപദേഷ്ടാവ്, മൂന്നാമൻ  കേന്ദ്രസർക്കാരുമായി ബന്ധങ്ങൾക്ക്‌ പാലമായി പ്രവർത്തിക്കുന്ന പോലീസ് ഉപദേഷ്ടാവ്. ഇവരിൽ ഒരാൾപോലും എകെജി സെന്ററിന്റെ നിയന്ത്രണത്തിൽ ആയിരുന്നില്ല.  മുഖ്യമന്ത്രിയുടെ നിയന്ത്രണത്തിലാണ് അവരെന്നു നേരത്തെ ഒരു സങ്കല്പമുണ്ടായിരുന്നു. എന്നാൽ സങ്കല്പവും  യാഥാർഥ്യവും തമ്മിൽ കടലും കടലാടിയും തമ്മിലുള്ള ബന്ധം മാത്രമാണുള്ളത് എന്നു ഇപ്പോൾ പാർട്ടി തിരിച്ചറിയുന്നുണ്ടാവണം. 

SHARE
  •  
  •  
  •  
  •  
  •  
  •  

Leave a Reply

Your email address will not be published. Required fields are marked *