കേരളത്തിലും താമര വിരിയുമെന്ന് മോദിജി!

ഇന്ത്യയിലെ പ്രഥമ ജഗപൊക പ്രധാനമന്ത്രിയാണ് നരേന്ദ്ര മോദി . അദ്ദേഹം ഭരണഘടന അനുസരിച്ചു നേർവഴിയിലൂടെ അധികാരം കയ്യാളുന്ന പ്രധാനമന്ത്രിയാണെങ്കിലും അദ്ദേഹത്തിന് എന്തോ ഒരു ആത്മവിശ്വാസക്കുറവുണ്ട്.

അയൽ രാജ്യവുമായി യുദ്ധം ചെയ്തു വിജയക്കൊടി നാട്ടി. . ഉറക്കം നടിക്കുന്ന രാജ്യത്തെപ്പോലും വിളിച്ചുണർത്തി ഒരു കൈ നോക്കാമോ എന്ന് വെല്ലുവിളിക്കുന്നു. ഏതു വെള്ളം കലക്കിയാലും കുളത്തിൽ പൂന്തിങ്കൾ പോലെ വിരിയുന്നത് പൊൻതാമരമാത്രം. എന്നിട്ടും മോദിജിക്ക്‌ ഒരേ ഒരു സംശയം. ഇത്രയൊക്കെയായെങ്കിലും പരശുരാമന്റെ മഴു എടുത്തൊന്ന് എറിഞ്ഞു ലക്ഷ്യത്തിൽ കൊള്ളിച്ചില്ലെങ്കിൽ ആണത്തം ഇല്ലെന്ന് ജനം ധരിച്ചാലോ? !

ത്രിപുരയിൽ സിപിഎം വിട്ടു ബിജെപിയിൽ ചേർന്ന് മത്സരിച്ച സിറ്റിംഗ് എം എൽ എ പോലും 9686 വോട്ടിന്‌ തോറ്റതിന്റെ “ഞെരുക്കത്തിൽ” നിൽക്കവെയാണ് കേരളത്തിൽ മോദി ബിജെപി ഭരണം സ്വപ്‍നം കാണുന്നത് എന്നത് മറ്റൊരു തമാശ. . ത്രിപുരയിൽ വൻ ഭൂരിപക്ഷത്തോടെ കൂറുമാറിവന്ന എം എൽ എ യെ പോലും രക്ഷിക്കാൻ ശേഷിയില്ലാത്ത പ്രധാനമന്ത്രിയാണ് കേരളത്തിൽ കൊടിനാട്ടും എന്ന് വീമ്പടിക്കുന്നതെന്ന് ദോഷൈകദൃക്കുകൾ പറയുന്നുണ്ടാകും. മോദിജി ഇന്നലെ എന്താണ് സത്യത്തിൽ പറഞ്ഞത് ?

“വരും വർഷങ്ങളിൽ കേരളത്തിലും ബിജെപി സർക്കാർ വരും.ന്യുനപക്ഷങ്ങൾ ഇപ്പോൾ ബിജെപിയെ ഭയക്കുന്നില്ല.ഗോവയിൽ അത് കണ്ടതാണ് ഇപ്പോൾ വടക്കുകിഴക്കൻ സംസ്ഥാനങ്ങളിലും ക്രിസ്ത്യൻ സഹോദരങ്ങൾ ബിജെപിക്ക് ഒപ്പം നിന്നു.പല സംസ്ഥാനങ്ങളിലും ഗുസ്തി പിടിക്കുന്നവർ വടക്ക് കിഴക്കൻ മേഖലയിൽ ദോസ്തി ആണ്. ഇത് കേരളം ജനതെയും കാണുന്നുണ്ട്. പ്രധാനമന്ത്രി നരേന്ദ്ര മോദി )

അതുകൊണ്ടാണ് മോദിജി ഇന്നലെ വടക്കുകിഴക്കൻ യുദ്ധം കഴിഞ്ഞപാടെ . “വരാനിരിക്കുന്ന ബിജെപിക്കാറ്റിൽ കേരളവും വീഴും എന്ന് പറഞ്ഞു കോൾമയിർക്കൊണ്ടത് .

പക്ഷെ രാവിലെ പത്രം എടുത്തു നോക്കിയപ്പോഴാണ് അബദ്ധം മനസിലായത് . ഇത് ഏശിയില്ല. പ്രധാനമന്ത്രി നേരിട്ട് പ്രഖ്യാപിച്ചിട്ടും ഒരു മാധ്യമവും വാർത്ത ഏറ്റെടുക്കുന്നില്ല. ഒറ്റ താമരപോലും പത്രങ്ങളിൽ വിരിഞ്ഞിട്ടില്ല. ഒരു ബിജെപിക്കാരനും കേരളത്തിൽ ഉറക്കമെണീറ്റിട്ടില്ല എന്ന് അർഥം. ഇതിന്റെ പേരിൽ ഏതെങ്കിലും സിപിഎമ്മുകാരൻ ഭള്ളു പറഞ്ഞാലേ ഇനി പ്രതികരിക്കാനും ബിജെപിക്കാരൻ ഉള്ളൂ.

ഇന്ത്യയിൽ കേരളഘടകത്തെ പോലെ ഇത്രയേറെ സമ്പന്നന്മാർ ഉള്ള പാർട്ടി ഗുജറാത്തിൽ പോലും ഇല്ല. കേരളത്തിലെ കുഴൽപ്പണത്തിന്റെ ഉറവ കണ്ടിട്ടാണോ മോദിജിക്ക്‌ കേരളത്തെക്കുറിച്ചു ഇത്ര ആത്മവിശ്വാസം തോന്നിയതെന്ന് അറിയില്ല. പൊതുനിരത്തിലൂടെ നടക്കുന്നവരുടെ എണ്ണത്തിൽ ഏഴ് വർഷം മുമ്പ് വരെ പി ടി ഉഷയെക്കാൾ വേഗത്തിലായിരുന്നു കേരളത്തിലെ ഗ്രാമവാസികൾ. ഇപ്പോൾ അങ്ങിനെയല്ല.അവരെല്ലാം ഇന്നോവ കാറിലാണ്. ക്ഷേത്രങ്ങളിൽ പോയാലും അർദ്ധനഗ്നരായ താമര ഭക്തർ ഭീമാ പട്ടരുടെ സ്വർണം പതിച്ച ആഭരണങ്ങളും നെഞ്ചോട് ചേർത്തുപിടിച്ചാണ് ഭഗവാനെ വലം വെക്കുന്നത്. പണ്ട് ഒരു മേൽമുണ്ട് പോലുമില്ലാതെയായിരുന്നു .ശ്രീപദ്മനാഭന്റെ മണ്ണിന്റെ ഗുണം വെച്ച് നോക്കിയാൽ നായനാർ പറയാറുള്ളതുപോലെ കിടക്കുന്ന കിടപ്പിൽ കാലുവാരുന്ന ചരിത്രമേ അതിനുള്ളൂ.

ഒന്ന് റോഡിൽ ഇറങ്ങി നോക്കിയേ 140 സീറ്റിലേക്ക് ആരൊക്കെയാണ് താമരയുമായി നിയമസഭയിലേക്ക് പോകാൻ കൊള്ളാവുന്നവർ എന്ന്. എന്തൊക്കെ ശ്രേഷ്ഠ ഗുണങ്ങൾ ഉള്ളവർ! ജനങ്ങളെ കണ്ണിലുണ്ണിയായി സേവിക്കുന്നതിൽ ഉഗ്രമൂർത്തികൾ.ശ്രീപദ്മനാഭന്റെ ഓരോ കവാടത്തിൽ ഇറങ്ങാനും കയറാനും ഓരോ ഇന്നോവ കൊണ്ടിടുന്നവർ. ഓരോ ദിവസവും കിട്ടിയതെത്ര എന്നെഴുതാൻ മാത്രം കണക്ക് പുസ്തകം സൂക്ഷിക്കുന്നവർ! കോർപ്പറേഷൻ മേയർക്ക് സ്വൈര്യമായി ഭരണം മുന്നോട്ട് കൊണ്ടുപോകണമെങ്കിൽ ഏതൊക്ക എലുകയിലുള്ള വസ്തു കരമൊഴിവാക്കി പതിച്ചു തരണമെന്ന് ആഗ്ര ഹിക്കുന്നവർ . നാടിനൊപ്പം തങ്ങളുടെ കുംഭയും വളരണം എന്ന് പരസ്യമായി ശഠിക്കുന്നവർ.ഏതു സമരവും ആവിയാക്കിക്കൊടുക്കുമെന്ന് പരസ്യമായി പ്രഖ്യാപിക്കുന്നവർ .അവരുടെ ഭരണം തലസ്ഥാനത്തും വരുമെന്നാണോ ഇന്നലെ മോദിജി പ്രഖ്യാപിച്ചത്! എന്തായാലും ഞങ്ങൾക്ക് മോദിജിയെ കിട്ടിയാൽ കൊള്ളാമെന്നുണ്ട്. പക്ഷെ ഈ അവതാരങ്ങളെ ……..

കേരളത്തിലും അടുത്തതായി താമര വരും എന്ന മോദിജിയുടെ പ്രഖ്യാപനം വായിച്ചപ്പോൾ ഇന്ത്യയിലെ ഏറ്റവും വിഖ്യാത ജോത്സ്യൻ കോടം രാജു നാരായണ റാവുവിന് ഒരു സംശയം നിയമന ഉത്തരവ് രാജ്ഭവനിൽ നിന്നാണോ മാരാർ ഭവനിൽ നിന്നാണോ വരാൻ സാധ്യത?. ആദ്യത്തെ സ്ഥലത്തുനിന്നാണെങ്കിൽ പത്തുവർഷം കാത്തിരിക്കേണ്ടിവരും! അപ്പോഴേ അവിടെ നടതുറക്കൂ .

May be an image of 1 person and beard

പ്രധാനമന്ത്രി നരേന്ദ്ര മോദി